Verð á meme-rafmyntinni $TRUMP hefur hækkað verulega eftir að Donald Trump, Bandaríkjaforseti, lofaði 220 stærstu fjárfestum í myntinni kvöldverðarboði. Matarboðið á að fara fram þann 22. maí næstkomandi á Trump-golfvellinum í Washington og verður að sögn forsetans eitt einstakasta boð sögunnar.
Tilkynning forsetans varð til þess að myntin hækkaði um 70% í verði en er þó enn talsvert undir upphaflega genginu þegar myntinni var ýtt úr vör í janúar síðastliðnum, rétt áður en Trump varð forseti.
Stofnun rafmyntarinnar var mjög umdeild á sínum tíma enda forsetinn augljóslega að reyna að hagnast persónulega á embættinu valdamikla. Fyrirtæki í eigu Trump áttu um 80% af útgefnum myntum en slíkar meme-rafmyntir eru alræmdar fyrir þær að ekkert verðmæti er á bak við þær annað en umtal og spenna í kringum myntirnar.
Þá höfðu margir áhyggjur af hagsmunaárekstrum og að öflugir erlendir fjárfestar gætu haft áhrif á Trump með því hafa áhrif á gengi myntarinnar.
Trump-myntinni var vel tekið til að byrja með og hækkaði hratt í verði. Hæst náði heildarvirði myntarinnar upp undir 15 milljarða dollara en síðan hefur hún gefið verulega eftir og er heildarverðmætið núna um 2,4 milljarðar dollara, þrátt fyrir matarboðið alræmda.
Ljóst er að gagnrýnisraddirnar varðandi meinta fjárplógsstarfsemi Trump í embætti munu ekki þagna við þetta nýja uppátæki hans.
Sjálfur hefur Trump titlað sig sem rafmyntaforsetann og lofað ýmsum aðgerðum til að festa þær enn frekar í sessi í Bandaríkjunum
