Mötuneytið Lindaskóla í Kópavogi fékk ekki góðan vitnisburð eftir skoðun Heilbrigðiseftirlits Garðabæjar, Hafnarfjarðar, Kópavogs, Mosfellsbæjar og Seltjarnarness (HEF), en skoðun fór fram þann 19. febrúar. Þar voru 48 atriði tekin til skoðunar og gerð krafa um umbætur í 40 tilvikum.

HEF segir í niðurstöðu skýrslunnar: „Mjög mikið er af frávikum sem þarf að fara í úrbætur á“ en skólinn fékk tveggja vikna frest til að bregðast við skýrslunni.

Meðal athugasemda voru eftirfarandi:

• Skemmdir á vegg fyrir aftan bakaraofn – en þar geta safnast óhreinindi eða örverur vaxið.
• Útidyrahurð höfð opin því loftræstikerfi er ekki nægjanlegt.
• Matvælavaskur notaður í uppvask.
• Vantar fataskiptaaðstöðu fyrir starfsfólk
• Vantar snyrtingu fyrir starfsfólk í mötuneyti
• Matvörur hafðar með tölvu og pappír, gömlum tómum dósum og öðrum hlutum sem eru ekki í notkun.
• Vantar úrbótaáætlun
• Vantar verklag um krossmengun.
• Matvæli fryst með plastfilmu utan um, en ekki má frysta matvöru í hvaða plasti sem er út af mögulegri plastmengun.
• Umgengnisreglum ekki fylgt
• Vantar verklag og vöktun á heilnæmi vatns.
• Matvörur geymdar á gólfi
• Vantar merkingar á umbúðir matara
• Þjálfun starfsfólks ábótavant
• Vantar meindýravarnir
• Vantar fluganet
• Óhreinindi við móttökudyr
• Vantar rekjanleika
• Vantar hættugreiningu
• Vantar verklag um meðhöndlun matarleifa og sorps.

Skoðunarmaður gerði sérstaka athugasemd við að starfsfólk notaði ekki hárnet. Hluti starfsfólks var ekki heldur í vinnufötum. Skoðunarmaður benti starfsfólki á að það ætti að vera með hárnet í mötuneytinu en starfsfólk setti samt ekki upp hárnet. Eins var sérstaklega tekið fram í skýrslunni að matvæli eigi ekki að vera geymd á gólfinu. „Matvörur eiga ekki að vera geymdar á gólfinu. Það þarf að geyma matvæli uppi í hillum, á brettum, á vögnum eða í lokuðum umbúðum.

Skýrsluna má lesa hér