Ökumaður í Reykjavík fékk 10 þúsund króna sekt fyrir að leggja bíl sínum á móti akstursstefnu. Fannst honum það blóðugt og sakar Bílastæðasjóð um peningaplokk af fólki sem vill aðeins leggja bílum sínum. Netverjar eru flestir ósammála honum og telja sektirnar góða leið til að fá fólk til að fylgja reglunum.
„Ég lagði bílnum mínum á móti akstursstefnu og fékk þar með 10þ kr sekt. Veit einhver hver ástæðan er fyrir því að svona er sektað? Er þetta bara svo ríkið geti tekið meiri pening af fólki sem vil bara leggja bílnum sínum?“ segir ökumaðurinn á samfélagsmiðlinum Reddit. „Ég skil það er vegna þess að þá er öruggara að keyra úr stæðinu aftur í umferð, en er það virkilega eina ástæðan? Þetta er svo bilaðslega hátt gjald.“
Í athugasemdum er honum bent á að til að sleppa við svona sektir er best að leggja ekki á móti akstursstefnu. Það sé bannað með lögum og hættulegt. En þegar ökumaður tekur af stað í veg fyrir umferð er sjónsvið hans skert gagnvart aðsteðjandi umferð.
„Þú fékkst sekt af því að þetta er bannað. Þetta er ekki peningaplokk og Bílastæðasjóður er ekki blóðsugur. Þetta er ekki gjald, heldur sekt, sem er refsing fyrir að gera eitthvað sem er bannað,“ segir einn.
Annar bendir á að 10 þúsund krónur sé nú með því lægstu sektum sem fyrir finnast. Og enn annar á að þetta sé ódýrasta leiðin til þess að skilyrða rétta umferðarhegðun.
