Brotist var inn í rafrettubúð King Kong við Hverfisgötu (áður Grand Vape Shop) á laugardagsnótt og stolið þaðan töluverðu af varningi. Eigandi King Kong keðjunnar, Jón Thor Ágústsson, hefur undir höndum töluvert efni úr myndeftirlitskerfi af brotinu og er sláandi að sjá hvað innbrotsþjófarnir tveir virðist ungir.

„Sorglegt að sjá hvað þetta byrjar snemma,“ segir Jón Þór en hann telur að innbrotsþjófarnir séu á aldursbilinu 12-15 ára. Mjög lítið sést framan í þá en líkamsvöxtur, hreyfingar og klæðnaður gefa til kynna mjög ungan aldur.

„Þeir spörkuðu í plexigler sem er í hurðinni og brutu þannig festingarnar og stungu hendi á milli til að taka úr lás,“ segir Jón Þór, aðspurður um hvernig þjófarnir ungu brutu sér leið inn í verslunina. Tóku þeir töluvert af rafrettum og rafrettuvökva og skýtur Jón Þór á að tjónið nemi 150-200 þúsund krónum.

Skorar á drengina að vinna upp brotið

Jón Þór vill að drengirnir ungu gefi sig fram við hann og vinni einn dag í verslun hans við áfyllingu á goskæli og í sælgætishillur. Geri þeir það er málið gleymt. Gefi þeir sig ekki fram þá fer myndefnið til lögreglu.

Piltarnir geta haft samband við Jón Þór í gegnum Facebook-síðu hans, hér.