Í leiðaranum segir að Eyjólfur hafi átt „mjög óvenjulega“ innkomu inn í ríkisstjórn.
„Nú er það að vísu svo að ekki er alltaf fullkomið samræmi á milli þess sem menn eða flokkar segja fyrir kosningar og þess sem þeir sem í meirihluta veljast geta staðið við eftir kosningar. Flokkur fólksins og Eyjólfur fara þó eflaust nærri því að slá einhvers konar met í því ósamræmi sem er á milli orða fyrir og eftir kosningar,“ segir í leiðaranum.
Bent er á viðhorf Eyjólfs til Fossvogsbrúar fyrir kosningar og svo eftir kosningar.
Þann 9. október síðastliðinn virðist Eyjólfur ekki hafa átt von á því að hann myndi, örfáum mánuðum síðar, eiga eftir að taka fyrstu skóflustunguna að nýrri Fossvogsbrú. Sú var engu að síður raunin en í ræðu á Alþingi í október sagði Eyjólfur þetta um brúna:
„Ég hef líka spurt af hverju sé ekki farið í brú yfir Skerjafjörð eða jarðgöng yfir Skerjafjörð. Nei, það er verið að gera einbreiða brú yfir Fossvoginn fyrir strætó. Verðið á henni er búið að fjórfaldast og hún muni ekki breyta neinu, hún mun ekki hafa mikil áhrif. Það er meira verið að spá í það hvernig stál eigi að vera í þessari fínu brú. Þetta verður svona einkennismerki samgöngusáttmálans.“
Leiðarahöfundur Morgunblaðsins segir að allt þetta hafi verið rétt, en svo hafi þessir þrír mánuðir liðið og Eyjólfur orðið ráðherra í millitíðinni. Þá var komið annað hljóð í strokkinn.
„Það var mjög ánægjulegt að taka þátt í fyrstu skóflustungu Fossvogsbrúar á grundvelli samgöngusáttmálans. Tilkoma brúarinnar mun hafa mikla þýðingu við að dreifa álagi á vegum á höfuðborgarsvæðinu en gert er ráð fyrir að 10 þúsund manns ferðist daglega um brúna. Brúin mun létta á umferð á stofnvegum með því að fleira fólk mun kjósa að nýta aðrar samgönguleiðir,“ sagði Eyjólfur þann 17. janúar síðastliðinn.
