Friðjón gerði þar að umtalsefni fréttir gærdagsins þess efnis að Einar hygðist láta gera „alvöru úttekt“ á máli leikskólans Brákarborgar.
„Nú þurfum við að finna út úr því hvar liggur ábyrgðin, hvar voru mistökin gerð, af hverju er burðarþolið ekki í lagi. Þetta er algjörlega óásættanlegt. […] Ég lít svo á að þetta sé mjög alvarlegt mál og við ætlum að láta gera alvöru úttekt á því, “sagði Einar í Bítinu á Bylgjunni í gærmorgun.
Friðjón skaut léttum skotum á Einar vegna þessara orða hans.
„Einar Þorsteinsson, borgarstjóri ætlar í „alvöru úttekt“ á Stóra-Brákarborgarmálinu. Við hljótum því að gagnálykta að þetta sé nauðsynleg aðgreining frá öðrum úttektunum borgarinnar sem voru ekki „alvöru“. Það væri því ágætt að fá úttekt á því hvaða fyrri úttektir borgarinnar teljast til „alvöru úttekta“ og hvaða úttektir gera það ekki. Það væri kostur að sú úttekt væri „alvöru úttekt“.“
Einar var ekki lengi að svara kollega sínum úr borgarstjórn Reykjavíkur og lagði til við Friðjón að hann prófaði annan starfsvettvang.
„Þú ættir að prófa uppistand Friðjón, þetta er bráðfyndið hjá þér. Geri líka ráð fyrir að foreldrar fagni þessu málefnalega innleggi Sjálfstæðismanna inn í þetta alvarlega mál. Hjálpar sannarlega til að draga umræðuna niður í svona ameríska umræðuhefð. En þú ert auðvitað sérfræðingur í henni,“ sagði borgarstjóri en Friðjón er mikill áhugamaður um bandarísk stjórnmál.
Friðjón svaraði Einari og spurði hvort Kanarnir hefðu núna einkarétt á smá skopi. Það finnist honum skrýtið.
„En stundum er fáránleikinn þannig að það er ekki annað hægt en að benda á hversu grátbroslegur hann er,“ sagði Friðjón og bætti við:
„Það gengur bókstaflega ekkert upp hjá ykkur, borgin er á hausnum, engar íbúðir eru byggðar, Sundabraut er stopp, leikskólamálin eru í hassi, samgöngur í hægagangi og ég er ábyggilega að gleyma einhverju enn mikilvægara en að lokum, breytingarnar sem þið lofuðu, fyrir utan hver situr á borgarstjórastólnum, hvernig gengur?“
Einar hefur ekki svarað Friðjóni þegar þetta er skrifað.
