Lögreglan á höfuðborgarsvæðinu hafði afskipti af manni í hverfi 108 sem „beraði sig og hristi“ að sögn lögreglu. Manninum var sleppt að loknum viðræðum við varðstjóra.

Lögreglu var svo tilkynnt um innbrot í geymslur í hverfi 105 og voru eigendur að heiman. Að minnsta kosti einu reiðhjóli var stolið í innbrotinu. Þá var tilkynnt um menn í miðborginni að sveifla loftbyssum og hleypa af skotum.

Í hverfi 210 var svo tilkynnt um skemmdarverk þar sem nokkrar rúður höfðu verið brotnar. Gerendur fundust ekki þrátt fyrir leit. Loks var tilkynnt um fjársvik í hverfi 200 þar sem einstaklingur stakk af frá leigubifreið án þess að greiða fyrir fargjaldið. Viðkomandi fannst og á kæru yfir höfði sér vegna málsins.