Athygli hefur vakið á samfélagsmiðlum að stórmarkaðurinn Costco í Garðabæ hefur nú til sölu demantshring sem verðlagður er á tæpar 18 milljónir króna. Það er 17.999.999 krónur.
Hringurinn sem er hafður til sýnis er hins vegar aðeins eftirlíking. Tilgangslaust væri því fyrir fingralanga að ætla að nappa honum undan glerinu.
Í athugasemdum við færslu þar sem verið er að ræða téðan demantshring segja nokkrir að um sé að ræða sálfræðilega sölutaktík hjá versluninni. Það er að rándýrum hlutum sé stillt upp við inngang verslunarinnar til þess að það sem viðskiptavinurinn sér seinna virki afar ódýrt í samanburðinum. Ekki sé búist við því að þessir dýru hlutir seljist.
Aðrir benda á að verðlag á demöntum sé afar bjagað. Fá fyrirtæki hafi einokunaraðstöðu á demantamarkaði og ekkert réttlæti þetta háa verð.
Ýmislegt óvanalegt og rándýrt hefur verið selt í Costco í gegnum tíðina. Það hefur þó ekki aftrað Íslendingum frá því að rífa upp budduna.
Árið 2020 var greint frá því að gullstangir sem verslunin flutti inn hefðu selst upp á einum degi. Verðið á 20 gramma gullstöng var 224 þúsund krónur, 50 gramma á 550 þúsund og 100 gramma á 1 milljón og 120 þúsund krónur. Gullstangir eru enn þá seldar í Costco.
Þegar Costco opnaði árið 2017 voru fluttar inn tvær risastórar styttur, annars vegar af fíl og hins vegar af gíraffa. Styttan af fílnum fór fljótlega í Fjölskyldu og húsdýragarðinn en maður að nafni Gunnar Páll Tryggvason keypti gíraffann. Hann kostaði eitthvað á fjórða hundrað þúsund krónur.
„Ég hugsaði þetta kannski ekki alveg til enda,“ sagði Gunnar í viðtali við Vísi á sínum tíma þegar hann var búinn að fá Gíraffann í garðinn til sín.
