Lögreglan á Kanaríeyjum handtók fyrir skömmu níu manns á hinni þekktu Adeje-strönd á Tenerife, fyrir að selja falska merkjavöru. Canarian Weekly greinir frá.
Í aðgerðinni var lagt hald á yfir 1.100 falsaðar vörur, þ.e. vörur sem bera þekkt vörumerki án þess að koma frá viðkomandi framleiðendum. Segir að kvartanir yfir þessum vörusvikum hafi leitt til aðgerða lögreglu sem lagði hald á ógrynni af úrum, veskjum, handtöskum og fatnaði í verslunum á helstu verslanagötum Adeje.
Í yfirlýsingu frá lögreglu segir að afbrot af þessu tagi dragi úr gæðaöryggi fyrir kaupendur merkjavöru og veiti ósanngjarnt forskot á markaði gagnvart verslunum sem bjóði upp á ósvikna merkjavöru.
Fréttin hefur vakið athygli á meðal íbúa og ferðamanna á Tenerife og á Facebook-síðu Canarian Weekly er framganga lögreglu gagnrýnd: „Þeir ættu frekar að taka vasaþjófana úr umferð“ segir einn þar og annar bætir um betur, í hæðnistóni: „Frábærlega farið með tíma lögreglu…að vernda vörumerki milljarðafyrirtækja á meðan þjófar stela vörunum frá viðskipavinum þeirra.“
Útbreiddur vasaþjófnaður á Tenerife hefur verið í fréttum undanfarið. DV greindi frá því nýlega, sem og raunar einnig frá fölsunum á merkjavöru:
