Maður sem ættleiddur var hingað til lands frá Sri Lanka á níunda áratugnum, Ívar Hlynur Ingason, telur að sér hafi verið rænt af fæðingardeildinni eftir að móður hans var byrlað svefnlyfi. Segist Ívar hafa sannanir fyrir þessu.

RÚV greinir frá.

Ívar vill að íslensk stjórnvöld skoði ættleiðingar frá landinu á 9. áratugnum betur og axli ábyrgð á þeim mannréttindabrotum sem framin hafi verið, að hluta með þeirra blessun. Víða í Evrópu hafa komið upp mál fólks sem ættleitt var til Evrópu frá Sri Lanka á síðari hluta 20. aldar.

Ívar og fleiri einstaklingar sem ættleiddir voru frá Sri Lanka til Íslands hafa farið fram á að íslensk stjórnvöld axli ábyrgð á sínum þætti í málum þeirra og brotum gegn blóðættingjum þeirra.

„Ég vildi bara fá almennilega rannsókn á þessu. Þetta snýst ekki um einhverjar skaðabætur eða eitthvað. Bara að fá viðurkenninguna á því að það áttu sér stað einhver gígantísk mistök, vanræksla eða hvað sem það er,“ segir Ívar í viðtali við RÚV.