Karl Sigurbjörnsson, fyrrverandi biskup Íslands, er látinn. Frá þessu greinir fjölskylda hans. Karl lést á gjörgæsludeild Landspítalans í morgun, 77 ára að aldri.
Karl var biskup Íslands árin 1998 til 2012. Þar áður hafði hann verið sóknarprestur í Hallgrímsprestakalli frá árinu 1975.
Faðir Karls var Sigurbjörn Einarsson sem var biskup Íslands frá árinu 1959 til 1981. Karl var fæddur árið 1947 í Reykjavík, sjötti af átta systkinunum þeirra Sigurbjörns og Magneu Þorkelsdóttur.
Hann var vígður árið 1973 og hefur gegnt ýmsum trúnaðarstörfum fyrir Þjóðkirkjuna og Prestafélag Íslands.
Eftirlifandi eiginkona Karls er Kristín Þórdís Guðjónsdóttir. Þau eiga þrjú börn og átta barnabörn.
