Uppreisnarmenn náðu völdum í höfuðborginni Damaskus í Sýrlandi í morgun. Fregnir herma að Bashar al-Assad forseti hafi flúið borgina og virðist því sem rúmlega hálfrar aldar valdatíð Assad-feðga í landinu sé lokið. Hafez al-Assad, stýrði landinu með harðri hendi frá 1971 til dauðadags árið 2000, tók sonur hans Bashar, þá við stjórnartaumunum.
Reuters greinir frá því, og hefur eftir tveimur sýrlenskum heimildarmönnum, að mjög miklar líkur séu á því að Assad hafi farist í flugslysi. Flugvél tók á loft frá flugvellinum í Damaskus um það leyti sem uppreisnarmenn tóku borgina á sitt vald. Samkvæmt upplýsingum frá Flightradar vefsíðunni tók vélin óvænta u-beygju og hvarf af kortinu.
Ríkissjónvarpið í Sýrlandi birti í dag frétt um sigur uppreisnaraflanna á glæpastjórn Bashar al-Assad. Mohammed Ghazi Jalali, forsætisráðherra Sýrlands, hefur lýst því yfir að hann sé reiðubúinn til samvinnu.
Uppreisnarmenn hafa náð stærstu borgum landsins á sitt vald, eins og sjá má á meðfylgjandi mynd BBC.
Borgarastyrjöld hefur geisað í landinu frá árinu 2011 og hefur rúmlega hálf milljón Sýrlendinga látið lífið. Uppreisnarmenn hófu stórsókn þann 27. Nóvember og Aleppo og Homs á sitt vald. Markmið þeirra var að koma Assad frá völdum og svo virðist sem það markmið hafi náðst í dag.
BBC greinir frá því að uppreisnarmenn hafi opnað Sadnaya fangelsið, sem er stórt herfangelsi í útjaðri Damaskus þar sem sýrlensk stjórnvöld hafa vistað þúsundir manna, þar á meðal pólitíska fanga. Í Sadnaya hafa andstæðingar Assad verið pyntaðir og teknir af lífi.
Geir O. Pedersen, erindreki Sameinuðu þjóðanna gagnvart Sýrlandi, segir landið standa á tímamótum.
