Guðmundur Ragnarsson, fyrrverandi formaður Félags vélstjóra og málmtæknimanna, hefur ákveðið að segja sig úr flokknum. Þetta þykja nokkur tíðindi enda var hann ofarlega á lista flokksins í Reykjavík norður í síðustu kosningum.

Guðmundur greinir frá þessu á Facebook-síðu sinni.

„Það er komin niðurstaða hjá mér hvað ég ætla að kjósa. Ég mun ekki kjósa Viðreisn þó ég hafi verið í fjórða sæti í Reykjavík norður í síðustu kosningum. Mun segja mig úr flokknum vegna stefnuleysis hans í öllum málaflokkum,“ segir hann og bætir við:

„Ég get ekki áttað mig á því hver stefnan er, önnur en að segja það sem talið er að kjósendur vilji heyra til ná í atkvæði og komast í ráðherrastóla. En samt að segja ekki neitt um það hvað á að gera eða það eru engar raunhæfar lausnir til að setja fram.“

Hann segir að áframhaldandi stuðningur við þéttingarstefnu á höfuðborgarsvæðinu muni eingöngu viðhalda verðbólgu og hærri vöxtum.

„Stjórnmálaflokkur sem ætlar ekki að viðurkenna þau efnahagsmistök sem búið að gera þar, er ekki að fara að leysa nein vandamál. Hvað ég ætla að kjósa mun ég ekki gefa upp. Er búinn að kynnast mörgu frábæru fólki þennan tíma, en nú skilja leiðir.“