Lögreglan á höfuðborgarsvæðinu rannsakar nú þjófnað sem fjölskylda í Þverási varð fyrir í nótt.

Þjófarnir óku á brott gráum Toyota Auris með númerið FE-H23 en hann er í eigu 17 ára unglings. Í bílnum var Lenovo-fartölva piltsins og allar skólabækurnar hans.

Einnig var farið inn í bíl föður unga mannsins og teknir þaðan mikilvægar lyklar og tæki.

Halla Þórðardóttir, eiginkona og móðir þeirra sem urðu fyrir þjófnaðinum, hefur óskað eftir mögulegum gögnum úr myndeftirlitskerfum frá svæðinu, ef einhver luma á slíku. Fjölskyldan er með Ring-myndeftirlitsbúnað en vélarnar náðu ekki að nema brotið.

„Þetta er gríðarlegt tjón fyrir okkur. Fyrir utan að tekinn er heill bíll 17 ára unglings þá fara skólagögnin hans með og fartölva heimilisins. Síðan er það allt sem þeir tóku úr bíl mannsins míns. Það hefur ýmistlegt dunið á okkur síðastliðin ár og hjá okkur heggur svona fjárhagslegt tjón djúpt,“ segir Halla í samtali við DV.

Aðspurð segist Halla hafa verið í sambandi við lögreglu vegna málsins. Þeir sem kunna að hafa upplýsingar um málið eru beðnir um að senda Höllu skilaboð í gegnum Facebook-síðu hennar.

Meðfylgjandi er mynd af bílnum sem var stolið.