Hrafnhildur Bridde, löggiltur fasteignasali og fyrrverandi eigandi HB fasteigna slf, sem nú er gjaldþrota rétt eins og Hrafnhildur sjálf, hefur verið ákærð fyrir fjárdrátt, en til vara umboðssvik, vegna millifærslna sem nema samtals 115.646.285 kr.

DV hefur ákæru héraðssaksóknara í málinu undir höndum en þar kemur fram að Hrafnhildur er sökuð um að hafa dregið sér, í 34 tilvikum, af fjárvörslureikningi í Íslandsbanka, sem hún var með vegna starfa sinna sem löggiltur fasteignasali og eigandi HB fasteigna. Viðskiptavinir fasteignasölunnar lögðu fjármunina inn á fjárvörslureikning Hrafnhildar vegna sölu á sjö fasteignum. Hrafnhildur er sögð hafa misnotað aðstöðu sína þar sem hún hafði ráðstöfunarheimild yfir vörslufjárreikningnum og nýtt fjármunina ýmist í þágu annarra og ótengdra viðskiptavina fasteignasölunnar, í þágu fasteignasölunnar sjálfri og í eigin þágu.

Segir í ákærunni að þetta framferði Hrafnhildar hafi leitt til verulegrar fjártjónshættu fyrir viðskiptavinina sem áttu þessa peninga.

Sem fyrr segir voru millifærslurnar ólöglegu 34 talsins og voru þær gerðar á tímabilinu 6. desember 2020 til 19. desember árið 2021. Tengdust brotin viðskiptum með fasteignir í Hveragerði, Þorlákshöfn og Mosfellsbæ.

Hrafnhildur og HB fasteignir slf. voru úrskurðuð gjaldþrota þann 23. febrúar árið 2022.

Málið gegn Hrafnhildi verður þingfest við Héraðsdóm Reykjavíkur þann 26. nóvember næstkomandi.