Dómur hefur enn ekki verið kveðinn upp í máli sem varðar harmleikinn er varð í fjölbýlishúsi við Nýbýlaveg aðfaranótt 31. janúar 2024. Móðir um fimmtugt er ákærð fyrir að hafa orðið sex ára syni sínum að bana og fyrir tilraun til manndráps gagnvart 11 ára bróður hans.
Aðalmeðferð í málinu var 12. september síðastliðinn, við Héraðsdóm Reykjaness. Venja er að dómur sé kveðinn upp innan fjögurra vikna frá réttarhöldum.
Í ákæru er konan sögð hafa svipt son sinn lífi með því að setja kodda yfir andlit hans og þrýsta á með báðum höndum. Einnig hafi hún þrýst á háls hans og efri hluta brjóstkassa og hafi ekki linað tökin uns hún varð þess áskynja að drengurinn var látinn, en hann lést af völdum köfnunar.
Hún er í annan stað sögð hafa reynt að kæfa eldri bróður drengsins í svefni en hann hafi vaknað við atlöguna og losað sig úr takinu.
Fram kemur í svari Héraðsdóms Reykjaness við fyrirspurn DV að dómur hafi ekki enn verið kveðinn upp í málinu. Búast megi við að dómur falli næstu daga og verður hann birtur á vefsíðu dómstólanna.
