Lögreglan á höfuðborgarsvæðinu handtók einstakling í gærkvöldi eða í nótt vegna rannsóknar á stórfelldri líkamsárás. Þá voru þrír vistaðir í fangageymslu vegna rannsóknar á ráni í öðru aðskildu máli.

Ekki koma nánari upplýsingar fram um málin í skeyti lögreglu yfir verkefni gærkvöldsins og næturinnar.

Þá var maður vistaður í fangageymslu vegna rannsóknar á sölu fíkniefna. Maðurinn var ekki með skilríki á sér og því ekki vitað með vissu hver hann er.

Lögregla stöðvaði svo ökumann eftir að hann mældist á 171 kílómetra hraða þar sem hámarkshraði er 80 kílómetrar á klukkustund. Hann var sviptur ökuréttindum til bráðabirgða.