Glúmur Baldvinsson alþjóðastjórnmálafræðingur fer ekki fögrum orðum um bankakerfið eftir að hafa átt erindi í Íslandsbanka í gær. Glúmur hugðist leggja pening inn á reikninginn sinn en það gekk ekki þrautalaust fyrir sig.

Glúmur segir frá þessu á Facebook-síðu sinni í færslu sem fengið hefur mikil viðbrögð.

Hann segir að gjaldkerinn, ung stúlka, hafi byrjað að spyrja spurninga og farið að fletta upp færslum á reikningi hans. Glúmur segist hafa sagt gjaldkeranum að fjármál hans kæmu henni ekkert við og hún ætti bara að sinna sínu starfi og þjóna kúnnanum.

„Hún röflaði eitthvað um hertar splunkunýjar reglur um eftirlit með peningaþvætti. Ég benti henni þá á að engar nýjar reglur hefðu tekið gildi í sumar enda ekkert Alþingi starfandi síðan í vor. Að auki benti ég henni á að hún og hennar banki væru ekkert yfirvald hér heldur þjónustustofnun. Með erfiðismunum fékk ég mínu framgengt í banka sem ég hef verið í viðskiptum við frá seytján ára aldri þegar hann hét Verzlunarbankinn. Hvur djöfulinn halda þessir bankar að þeir séu?,“ sagði Glúmur í gærkvöldi og sagðist vera „rjúkandi bálreiður“ vegna málsins.

Margir taka undir með Glúmi en einn bendir á að stúlkan hafi nú bara verið að sinna sínu starfi og ekkert sé við hana að sakast. Þessar hertu reglur megi rekja til lagabreytinga sem tóku gildi árið 2018 til að koma í veg fyrir peningaþvætti og fjármögnun hryðjuverka. Sitt sýnist hverjum um þessar breytingar eins og komið hefur fram.

„Já, það er algerlega óþolandi að það sé horft á mann sem krimma ef maður á pening,“ segir í einni athugasemd við færslu Glúms. Í annarri segir einn: „Það er ekki hinn sauðsvarti almenningur á Íslandi sem misfer með peninga.“