Þorvaldur Þórðarson, prófessor í eldfjallafræði, segir við Morgunblaðið í dag að eldgosið sem hófst á Sundhnúkagígsröðinni í síðustu viku sé óvenjulegt að mörgu leyti. Ekki sé hægt að útiloka að innviðir norður af gossvæðinu verði í hættu ef fram heldur sem horfir.

Þorvaldur bendir á að virknin sé mest á norðurenda gossprungunnar og kvikustrókavirknin hafi verið stöðug og býsna öflug.

„Þó svo að kvikustrók­um fari fækk­andi þá eru strók­arn­ir ansi öfl­ug­ir,“ seg­ir Þor­vald­ur við Morgunblaðið og nefnir að strókarnir nái 75 til 150 metra hæð, eða sem nemur 1-2 Hallgrímskirkjuturnum.

Hann segir að hraunið flæði til norðurs og eins og sakir standa afmarkist gosflæðið við óbyggð svæði þar sem innviðir eru ekki í sérstakri hættu. Það geti þó breyst og ekki megi útiloka það.

„Það er um­hugs­un­ar­efni ef þetta held­ur áfram að flæða til norðurs. Þá er al­veg mögu­leiki á að innviðir sem eru þarna norðan við, eins og vatns­ból Vogamanna og þeirra í Reykja­nes­bæ, jafn­vel Reykja­nes­braut­in og kannski eitt­hvað meira, gætu orðið fyr­ir áhrif­um af hraun­flæði,“ segir Þorvaldur við Morgunblaðið í dag.