Karlmaður lést í eldsvoða sem varð í íbúðarhúsnæði við Amtmannsstíg, í miðborg Reykjavíkur, í morgun. Vísir greinir frá.
Slökkviliði barst útkall vegna elds í húsinu um áttaleytið í morgun. Fljótlega kom tilkynning um að maður væri líklega inni í húsinu. Var hann fluttur á sjúkrahús. Hann var síðan úrskurðaður látinn síðdegis í dag.
Guðjón Guðjónsson, aðstoðarvarðstjóri hjá slökkviliði höfuðborgarsvæðisins, segir í samtali við Vísi: „Við sendum allar slökkvistöðvar af stað, fjórar áhafnir og þrjá eða fjóra sjúkrabíla, og þegar við komum á staðinn var staðfest við okkur að það væri einstaklingur inni. Þannig við gengum í það að fara í lífbjörgun og reykkafarar okkar fóru inn með slöngu með sér og fundu einstaklinginn, komu honum í sjúkrabíl og hann var fluttur á bráðamóttöku.“
