Einar Sveinbjörnsson, veðurfræðingur á Bliku, segir að breytingar sé að sjá í spá Evrópsku reiknimiðstöðvarinnar frá því í gær.

Felast breytingarnar einkum í því að djúp lægð sem fer fyrir austan land verður nærgöngulli um leið og henni berst liðsauki eða aukinn kraftur á föstudag. Einar greinir frá þessu í nýjum pistli á vef Bliku en þar segir hann að spá GFS (bandarísku veðurstofunnar) sé enn á sömu línu og í gær.

„Sjáum á spákorti fyrir laugardag að lægðinni er nú spáð nánast uppi í landsteinunum. Og það sem er mest um vert að í stað þess að hún haldi áfram í rólegheitunum í átt til Skotlands, hægir hún á sér og verður frekar á hringsóli,“ segir Einar og birtir mynd máli sínu til stuðnings.

Hann segir að þetta hafi mikil áhrif, einkum þau að meira verður úr rigningunni og nýr bakki fær þar með vestur með suðurströndinni á laugardag.

„Minna verður úr hlýja loftinu norðan- og norðvestantil og meira þar líka úr vindi (NA-átt).  Miðað við þetta sleppur engin landshluti alveg við vætu. Mest suðaustantil og á Austfjörðum, en um norðvestanvert landið einkum framan af eða fram á laugardag, en síðan að líkindum alveg þurrt,“ segir hann.

Einar segir að spá GFS sé með öðrum brag og lægðin sé til dæmis fjarlægari og nái síður að draga í sig rakt loft sem fyrir er í suðri. Segir Einar að vegna þessa muni þeir sem skoða staðaspár af miklum móð sjá nokkurn mun á spám Veðurstofunnar og Bliku.

Hér má kynna sér spá Einars og skoða kortin sem hann birtir með pistli sínum.