Mikil umræða er á meðal Íslendinga á samfélagsmiðlinum reddit um að hið opinbera ráði aðeins starfsfólk tímabundið til að spara peninga. Fólk nái því ekki að vinna sér inn réttindi á vinnustaðnum. Einkum eigi þetta við um störf í skólum og umönnun.
Stuðningsfulltrúi í grunnskóla á höfuðborgarsvæðinu, sem er að klára annan veturinn sinn lýsir þessu svo:
„Það eru 6 skóladagar eftir fyrir sumarfrí og ég er ekki enn búin að vita hvort ég fái áframhaldandi vinnu eftir sumarið. Mér var sagt þegar ég byrjaði að eftir 2 vetur gæti ég fengið fastráðningu, en hingað til hafa samningarnir verið tímabundnir,“ segir hann. „Þar sem mér líkar þessi vinna mjög mikið er ég búin að tala við vinnuveitendann um það að halda áfram á föstum samningi, en eina svarið sem ég fékk var að ég þyrfti bara að sækja um aftur þegar þau auglýsa.“
Ræddi hann við samstarfskonu sína sem hafði það á tilfinningunni að skólinn vildi aðeins ráða inn nýtt og nýtt fólk, því fastráðið starfsfólk væri dýrara. „Hef svosem enga sönnun fyrir þessu, en mér þykir þetta mjög furðulegt að ég fái ekki bara svar af eða á. Mér finnst þetta líka senda ákveðin skilaboð til okkar stuðningafulltrúanna, eins og við skiptum ekki máli,“ segir stuðningsfulltrúinn.
Miklar umræður hafa spunnist um færsluna og tekið er undir að þetta sé líklega gert til að spara. Fólk hækkar ekki í launum og vinnur sér ekki inn réttindi ef það sé ráðið tímabundið inn.
Annar netverji sem starfaði sem stuðningsfulltrúi á höfuðborgarsvæðinu lýsir svipaðri reynslu.
„Samstarfskonu minni var sagt upp eftir tvö ár í starfi stuðningsfulltrúa þó hún óskaði eftir áframhaldandi starfi og hafði staðið sig mjög vel. Ég átti ekki von á öðru en að fá líka uppsögn enda hafði ég verið í starfinu í tvö ár eins og þessi samstarfskona mín og búin að falast eftir svörum um hvort ég fengi áframhaldandi starf í nokkrar vikur án svara. Það voru örfáir dagar í sumarfrí og ég vissi ekki hvort ég væri að verða atvinnulaus eða ekki. Tók því annarri vinnu sem mér bauðst óvænt þegar nokkrir dagar voru eftir af skólanum en fékk samt „hefði verið gott að vita þetta fyrr“ frá skólastjóranum,“ segir hann.
Kenna sumir fjársvelti um. Að þegar opinberar stofnanir hafi úr litlu að moða í fjárveitingum sé gripið til ráða eins og þessa við mönnun.
„Ég er í sama bát og þú, er núna búinn að vinna í eitt ár á sama vinnustað,“ segir einn starfsmaður á velferðarsviði Reykjavíkurborgar. Hann sé í 100 prósent starfi en hafi aðeins fengið þriggja mánaða samninga þar sem hann uppfyllir ekki hæfniskröfur og fólk sem uppfyllir þær fer í önnur og betur launuð störf.
„Ég er að minnsta kosti tvisvar í þessu starfi búinn að vera viku frá starfslokum áður en ég fékk að vita að ég fengi þrjá mánuði í viðbót. Svo gerist það oft að samningurinn kemur ekki fyrr en viku eða meira segja tvær inn í næsta tímabil,“ segir hann.
