Heiðar Örn Sigurfinnsson, fréttastjóri RÚV, hefur birt yfirlýsingu á Facebook, í tilefni af umræðu og fréttaflutningi um örlög innslags sem María Sigrún Hilmarsdóttir vann fyrir þáttinn Kveik, en fékkst ekki birt í þættinum.
Síðastliðinn þriðjudag, 23. apríl, stóð til að fréttaskýringaþátturinn Kveikur myndi sýna innslag fréttakonunnar Maríu Sigrúnar Hilmarsdóttur sem hafði verið í vinnslu í langan tíma. Af því varð þó ekki og hefur sú ákvörðun dregið dilk á eftir. Í gær var greint frá því að María Sigrún væri hætt í Kveiks-teyminu og gaus upp reiðialda þegar greint var frá því að Ingólfur Bjarni Sigfússon, ritstjóri Kveiks, hefði sagt að hæfileikar Maríu Sigrúnar lægju ekki á sviði rannsóknarblaðamennsku en að hún væri þeim mun betri að lesa upp fréttir.
Innslag Maríu Sigrúnar varðar umdeildan samning sem fráfarandi borgarstjóri, Dagur B. Eggertsson, gerði við Festi og Krónuna, Olíuverslun Íslands og Haga og Skeljung um nýtt hlutverk bensínstöðvalóða í þeirra eigu. Alls var um að ræða tólf lóðir á úrvalsstöðum í borginni, svokallaður fyrsti fasi í fækkun bensínstöðva í borgarlandinu, en samningurinn var strax afar umdeildur. Auk nýrra lóða undir starfsemi sína fengu olíufélögin gefins byggingarétt á lóðunum sem í fólust gríðarleg verðmæti sem hafa bara hækkað síðan.
Heiðar Örn segir fullyrðingar um að hér hafi annarleg sjónarmið ráðið för ekki eiga við nein rök að styðjast:
„Í dag og í gær hafa birst fréttir þess efnis að fréttaskýring sem var í vinnslu fyrir fréttaskýringaþáttinn Kveik og átti að sýna síðasta þriðjudag hafi verið tekin af dagskrá og jafnframt látið að því liggja að annarleg sjónarmið búi að baki. Það á ekki við nein rök að styðjast. Fréttaskýringin, sem hafði verið unnið að um skeið, var ekki fullbúin til sýningar í síðasta þætti Kveiks þennan vetur. Því buðu stjórnendur fréttastofu RÚV að málinu yrði fundinn farvegur í Kastljósi, næðist að klára að vinna það.
Að öðru leyti mun ég ekki tjá mig um þetta starfsmannamál eða vitna í trúnaðarsamtöl.“
