Sá orðrómur hefur verið á sveimi um hríð að Rússar hyggist ráðast á úkraínsku stórborgina Kharkiv, sem er næststærsta borg landsins, í væntanlegri stórsókn sinni í sumar. Ekki dró það úr orðróminum að Sergei Lavrov, utanríkisráðherra Rússlands, sagði nýlega að Kharkiv væri hugsanlegt markmið Rússa.

Institute for the Study of War (ISW) fjallaði nýlega um þetta í kjölfar ummæla Lavrov.

„Það er ekkert nýtt að Rússar hafi áhuga á að hertaka Kharkiv. En það sem er áhugavert er að nú er það beinlínis augljóst. Það bendir til ákveðinnar stríðsbjartsýni í Moskvu,“ sagði Jeanette Serritzlew, hernaðarsérfræðingur við danska varnarmálaskólann í samtali við TV2.

ISW segir að Lavrov hafi sagt að Kharkiv, sem er um 40 kílómetra frá rússnesku landamærunum, „gegni mikilvægu hlutverki“ í áætlunum Pútíns um að koma upp herlausu svæði (einnig kallað varðbelti). Slíku svæði er ætlað að vernda Rússland fyrir árás frá Úkraínu og þar má Úkraína hvorki vera með hermenn né vopn.

Voldomyr Zelenskyy, forseti Úkraínu, hefur áður varað við því að Kharkiv sé ofarlega á óskalista Pútíns.

Flemming Splidsboel, sérfræðingur í málefnum Rússlands, segir að það geti vel hugsast að Rússar vilji ná Kharkiv á sitt vald. Þar búi hálf önnur milljón manna og það væri þungt högg fyrir Úkraínu að missa borgina í hendur Rússa. Árás á hana myndi eyðileggja innviði hennar og mikill straumur flóttamanna myndi yfirgefa borgina.

Hann sagðist telja að það sé ekki auðveld ákvörðun fyrir Rússa að taka um hvort ráðast eigi á borgina. „Bardagar í borgum eru mjög erfiðir og engum líkar við þá. Það yrði martröð fyrir Rússa að ráðast inn í borg eins og Kharkiv og þeir myndu mjög líklega verða fyrir miklu tjóni. En það þýðir ekki að þeim detti þetta ekki í hug,“ sagði hann.

Serritzlew tók í sama streng og sagði að borgin freisti Rússa. Þetta yrði þá stærsta borgin sem þeir hafa náð á sitt vald síðan þeir náðu Maríupól. Flestir sigrar þeirra til þessa hafi verið litlir eða algjörlega eyðilagðir bæir.