Það er ekkert leyndarmál að Úkraínumenn sárvantar meiri getu í lofti til að geta stöðvað framsókn rússneska hersins á vígvellinum. En þrátt fyrir það eru vopnasendingar frá Bandaríkjunum og Evrópu í biðstöðu og úkraínskir hermenn verða í vaxandi mæli að finna óhefðbundnar aðferðir til að takast á við innrásarherinn.

Einfaldir hobbýdrónar hafa eyðilagt tvo þriðju af þeim rússnesku skriðdrekum sem hafa verið eyðilagðir á síðustu mánuðum. Þetta eru skriðdrekar sem kosta sem svarar til margra tuga milljóna íslenskra króna.

Embættismaður hjá NATÓ skýrði frá þessu í samtali við Foreign Policy.

Umræddir drónar, sem nefnast FPV-drónar, fást í nánast öllum tómstundabúðum og kosta sem svara til um 50.000 íslenskra króna.

Drónunum er stýrt með einfaldri fjarstýringu og þeir geta borið um 5 kíló af sprengiefni sem er annað hvort kastað á rússnesk ökutæki eða hermenn eða þá er þeim flogið beint á skotmarkið.

International Institute for Strategic Studies segir að úkraínsku hobbýdrónarnir hafi valdið rússneska hernum miklu tjóni en Rússar hafa misst rúmlega 3.000 skriðdreka síðan þeir réðust inn í Úkraínu. Þetta eru fleiri skriðdrekar en þeir höfðu til ráðstöfunar þegar innrásin hófst.