Heimsfrægar ísraelskar konur á borð við Gal Gadot, sem er einna þekktust fyrir að leika Wonder Woman, og poppstjarnan Noa Kirel gegnu herþjónustu. „Góð æfing fyrir hasarmynd í Hollywood,“ sagði Gal Gadot eitt sinn um tíma sinn í hernum.
Eftir margra ára þrýsting var konum nýlega heimilað að berjast í fremstu víglínu. Þetta hefur reynst svo vel að Yoav Gallant, varnarmálaráðherra, sagði nýlega að „þetta muni valda dramatískum breytingum á herskyldu kvenna“.
Nokkrar konur hafa gegnt yfirmannsstöðum í stríðinu á Gaza. Í janúar fór Amit Busi, kapteinn, fyrir 83 manna hersveit sinni, þar sem tæplega helmingur var karlar. Hún bar ábyrgð á að aðstoða fótgönguliða við að komast inn í skemmdar byggingar og byggingar sem búið var að koma sprengjum fyrir í og hætta var á að myndu hrynja og að bjarga særðum hermönnum frá vígvellinum.
Eins og allir aðrir svaf hún í tjaldi, var í stígvélunum á meðan hún svaf, var með sama útbúnað og aðrir en þyngd hans svaraði til þriðjungs líkamsþyngdar hennar. Hún varð einnig að sætta sig við að fá bara að fara í bað aðra hverja viku og það í gámi.
„Við erum hér af því að herinn hefur þörf fyrir okkur,“ sagði hún í samtali við New York Times.
Þegar Hamas réðst á Ísrael þann 7. október og hóf stríðið var skriðdrekadeild, eingöngu skipuð konum, nærri egypsku landamærunum. Hún var meðal þeirra fyrstu sem brugðust við og barðist við hryðjuverkamennina og tryggði öryggið við egypsku landamærin.
Herdeildin, sem var fest í sessi 2022 eftir tveggja og hálfs árs tilraunaverkefni, gerði út af við rúmlega 50 hryðjuverkamenn og kom í veg fyrir að hryðjuverkamenn kæmust lengra í suðurátt.
Times of Israel segir að þetta og aðrar hetjudáðir ísraelskra kvenna þann 7. október og síðar hafi líklega átt stærri hlut í að breyta því hvernig litið er á konur í ísraelska hernum en nokkur umræða eða tilraunaverkefni hefði gert.
