Heiða Eiríksdóttir, tónlistarkona og útvarpskona á Rás 2, neitaði í gærkvöld að spila lag með Hallbirni Hjartarsyni, látnum kúrekasöngvara og dæmdum barnaníðingi. Hlustandi bað um lag með Hallbirni og Heiða neitaði bóninni. Atvikið átti sér stað í þættinum Næturvaktin. Heyra má þáttinn hér, en umrædd orðaskipti um Hallbjörn eiga sér stað eftir um það bil 2 klst. og 16 mínútur.

„Aðstandendur hans, sem eiga um sárt að binda, þeim finnst ekki þægilegt að heyra tónlistina hans í Ríkisútvarpinu,“ sagði Heiða við hlustandann sem hún neitaði um þessa bón.

Næsti hlustandi sem náði inn kallaði Heiðu síðan dóna fyrir að hafa neitað hlustandanum á undan um að spila lag með Hallbirni.

Heiða greinir frá atvikinu í Facebook-færslu þar sem segir:

„Ég neitaði að spila lag í ríkisútvarpinu í kvöld. Það er með þekktum barnaníðingi sem sat í fangelsi fyrir glæpi sína en lést fyrir nokkrum árum. Næsti hlustandi sem náði inn öskraði á mig og skammaði mig fyrir að spila ekki lagið. Ég vil fá að segja þetta: Ég mun aldrei nokkru sinni hætta að standa með þolendum kynferðisofbeldis. Það breytir engu hvort einhver öskri eða skammist, ég hef þetta prinsip og má hafa það. Mér finnst í rauninni alltaf jafn skrýtið að fólk skilji það ekki, því þau sem ekki skilja eru í raun að leggja blessun sína yfir eina hræðilegustu glæpi sem fyrir finnast, sem er að misnota börn. Takk fyrir þau bréf sem ég fékk sem studdu mig í þessari ákvörðun. Svona lagað gerist í beinni útsendingu, þar sem allt getur gerst, en mér leið alveg smá illa eftir að vera skömmuð af reiðum kalli. Í guðanna bænum, kæra fólk, uppfræðið ykkur um hvað þolendur kynferðisofbeldis og eftirlifandi ættingjar kynferðisglæpamanna eru að upplifa þegar þau heyra þessi lög í útvarpinu. Það er ekkert í lagi við það.“