Úkraínumenn saka Rússa um að beita efnavopnum í stríðinu í Úkraínu. Úkraínskir hermenn sögðu Daily Telegraph að Rússar kasti táragasi og öðrum efnavopnum niður með aðstoð dróna.

Slava, háttsettur yfirmaður í úkraínska hernum, sagði að úkraínskir hermenn upplifi slíkar árásir nær daglega.

Rebekah Maciorowski, bandarískur hjúkrunarfræðingur sem starfar fyrir úkraínska herinn, sagði að í gassprengju, sem sprakk ekki eftir að Rússar köstuðu henni niður, hafi verið CS-gas, sem er táragas.

Samkvæmt alþjóðasamningi frá 1993 er bannað að nota CS-gas í stríði en Rússar hafa áður viðurkennt að þeir noti efnavopn gegn úkraínskum hermönnum.