Kastljósið hefur beinst að Reykjanesskaganum undanfarna mánuði og eins og flestum er kunnugt hefur nánast öll þjónusta lagst af í Grindavík, þar á meðal póstþjónusta.
„Við erum enn með póstbox í Grindavík en það er lokað eins og er. Allar sendingar sem berast fólki sem er enn með skráð heimilisfang í Grindavík fara á pósthúsið hér í Reykjanesbæ,“segir Elín Björg Guðmundsdóttir, rekstrarstjóri Póstsins á Suðurnesjum í tilkynningu.
Hún tekur þó fram að margir hafi breytt afhendingarvali sínu og enn sé verið að áframsenda pakka Grindvíkingum að kostnaðarlausu.
„Við mælum með að þau sem hafa nýtt heimilisfang, jafnvel bara tímabundið, skrái sig inn á Mínar síður og uppfæri þessar upplýsingar því þá er styttra að fara eftir pakkanum.“
Nokkurt magn af bréfapósti hefur safnast upp á pósthúsinu í Reykjanesbæ. „Við tókum upp á því að hringja í fólk til að láta það vita af því að þess bíði bréf hér á pósthúsinu. En það er best að láta áframsenda póstinn á nýtt heimilisfang og muna að merkja lúguna svo pósturinn rati á réttan stað,“ segir Elín Björg.
Allmargir úr Grindavík völdu að fá sendingarnar sínar í póstbox í Reykjanesbæ. „Starfsfólkið hér á hrós skilið því það hefur verið mjög duglegt að kynna póstboxin fyrir fólki. Póstboxin í Reykjanesbæ eru enda með þeim best nýttu. Þau eru orðin fimm talsins á Suðurnesjum, póstboxið við Orkuna í Njarðvík, Nettó á Iðavöllum, Kjörbúðina í Sandgerði, við Bæjarskrifstofurnar í Vogum og við pósthúsið hér í Keflavík. Fyllt er á boxin alla daga nema sunnudaga svo sendingarnar berast fljótt. Suðurnesjamenn eru ánægðir með að geta sótt pakkana sína á öllum tímum sólarhringsins í næsta nágrenni,”segir hún.
Elín Björg segist líka hreykin af því að Pósturinn sé kominn lengst í orkuskiptum á Reykjanesskaganum. „Frá því í haust hefur allt Reykjanesið verið „grænt“ því sendingarnar hér eru eingöngu fluttar með rafmagnsbílum. Og það skal tekið fram að farartækin okkar fara um 8000 km á mánuði svo það munar um minna.“
