Bergþóra segir frá þessu í samtali við Morgunblaðið í dag en í gær ræddi blaðið við Guðbrand Bogason, skólastjóra Ökuskólans í Mjódd, sem sagði merkilegt hversu vel útlendingum gengur að taka próf hér á landi þó þeir skilji ekki mikið í tungumálinu. Námskeiðin fara fram á íslensku sem og prófin og sagði Guðbrandur að það veki furðu hjá Íslendingum sem taka prófin hversu góðum árangri þeir ná.
Guðbrandur sagði við Morgunblaðið að skólinn hefði ekkert vald til að stoppa þetta og verkefnið væri unnið fyrir Samgöngustofu.
Bergþóra segir í samtali við Morgunblaðið í dag að tveir erlendir menn sem hún þekkir hafi beðið hana að hjálpa sér við að taka prófið. Þegar hún var spurð hvernig hún gæti hjálpað hafi þeir svarað að hún ætti að vera tilbúin því haft yrði samband við hana í gegnum Messenger.
Því næst hafi hún fengið sendar myndir og mennirnir spurt hvort merkja ætti við A, B eða C. Kveðst Bergþóra hafa svarað viðkomandi þar um. „Útlendingarnir taka myndir af spurningunum,“ segir hún og furðar sig á því að fólk komist upp með þetta.
Morgunblaðið ræðir einnig við Þórhildi Elínu Elínardóttur, samskiptastjóra Samgöngustofu, sem sagði að það væri á ábyrgð skólans að ekki sé svindlað á prófunum og noti óheimil hjálpargögn.
„Ef einhverjir eru að nota símann í óheiðarlegum tilgangi, þá er það skólans að tryggja að nemendur fari í gegnum prófin án þess að svindla,“ segir hún.
