Daníel vísar þarna til breytinga á lögum sem tóku gildi í fyrra þar sem heimildir til aksturs leigubíla voru rýmkaðar töluvert en fjallað hefur verið talsvert um málið síðustu vikur.
Daníel segir að áhyggjur hans og fleiri snúi að öryggi farþega og á það hafi verið bent áður en frumvarpið varð að lögum í fyrra. Ráðherra hafi einnig svikið það loforð sem hann gaf Frama um að halda fund með forsvarsmönnum félagsins áður en frumvarpið varð að lögum.
Daníel segir við Morgunblaðið að misbrestur sé á því að fylgst sé með að löggiltir gjaldmælar séu í öllum leigubílum. Lögin kveði á um að heimilt sé að aka leigubílum án gjaldmælis sé samið um verð fyrir fram.
Hann kveðst hafa heyrt dæmi þess að farþegar séu krafðir um háar fjárhæðir fyrir akstur á milli Keflavíkurflugvallar og Reykjavíkur.
Bendir hann á eitt dæmi frá Keflavíkurflugvelli þar sem gjaldmælir var settur í gang þegar viðkomandi leigubílstjóri mætti í röðina. Þannig séu til myndir sem sýna gjaldmæli standa í 10 þúsund krónum þegar lagt var af stað frá flugvellinum til Reykjavíkur.
„Vandinn er samt sá að þeir sem eru einir á „eigin stöð“ eru mjög margir og hafa eigin verðskrá. Allar leigubifreiðar eiga að vera með verðskrá sýnilega áður en sest er inn í bifreiðina. Það er ekki víst að því sé fylgt eftir,“ segir Daníel við Morgunblaðið.
