Talsverð reiði ríkir í Ástralíu yfir framferði þriggja unglinga sem tóku upp myndband þegar þeir ýttu varnarlausum eldri manni af bryggju og út í sjó og hlógu.

Maðurinn var ósyndur og getur hann sennilega þakkað vitnum að atvikinu fyrir að vera á lífi. Komu nærstaddir manninum til bjargar og drógu hann á þurrt.

Unglingarnir, sem allir eru undir lögaldri, birtu myndband af atvikinu á Facebook og átti lögregla því tiltölulega auðvelt með að hafa upp á þeim. Einn 14 ára piltur hefur verið handtekinn og mun hann mæta fyrir dóm á næstunni.

„Þau höfðu ekki hugmynd um það hvort hann væri syndur. Ímyndaðu þér ef hann hefði verið einn þarna, þá værum við að horfa upp á manndráp,“ segir Val Hardie, íbúi á svæðinu, í samtali við 7NEWS Australia.

„Þetta er ógeðslegt og algjör heigulskapur,“ segir annar íbúi í samtali við miðilinn.