Brynja Dan Gunnarsdóttir, bæjarfulltrúi Framsóknarflokksins í Garðabæ, varaþingmaður flokksins og einn af eigendum Extraloppunnar, segir að ástæða þess að í ár hafi verið minni verslun á degi einhleypra megi meðal annars rekja til þess að dagurinn, 11. nóvember – 11.11 – hafi komið upp á laugardegi í ár en það sé alltaf erfiðasti dagurinn þegar kemur að netverslun.

Dagurinn er haldinn hátíðlegur víða erlendis en segja má að Brynja hafi kynnt hann hérlendis en hún heldur úti vefsíðunni 1111.is þar sem tekin eru saman öll tilboð sem samstarfsaðilar vefsíðunnar bjóða. Íslendingar tóku deginum fagnandi en í ár var greint frá því að verslunin hafi minnkað verulega og byggðist það á tölum frá Rannsóknasetri verslunarinnar.

Sló Vísir því upp í frétt að salan hafi hrunið á deginum í ár og við þá nálgun var Brynja Dan ekki sátt og sendi frá sér eftirfarandi yfirlýsingu.

Það var vitað mál og í takt við allar spár að salan á sjálfum Degi einhleypra sem árlega er 11. nóvember yrði minni árið 2023. Það á sér þær eðlilegu skýringar að dagurinn kom nú upp á laugardegi og er alvitað að sá vikudagur er alltaf erfiðastur þegar kemur að netverslun. Þar sem að við erum alltaf á tánum brást ég að sjálfsögðu við þessari staðreynd í samstarfi við þau fjölmörgu fyrirtæki sem tóku þátt í deginum. Singles Day tilboðin urðu því virk föstudaginn 10. nóvember og voru virk út sunnudaginn 12. nóvember.

Við auglýstum þessa breytingu vel og ég kynnti hana allvíða enda vildum við leyfa neytendum að njóta tilboðanna og spara sér þannig aurinn. Það að það standi í frétt inni á Vísi að salan á Degi einhleypra hafi hrunið er jú jú kannski í grunninn rétt. Þess má samt geta að salan á þeim tilboðum sem Dagur einhleypra og samstarfsfyrirtækin buðu neytendum upp á hrundi bara alls ekki neitt og er dagurinn hreinlega ennþá með virkni á við ekkert minna en tvíhleypu. Í því samhengi er vert að koma því á framfæri að velta Netgíró var hærri þessa þrjá daga árið 2023 en sömu daga árið á undan. Ég fagna allri fjölmiðlaumfjöllun í kringum þetta verkefni sem mér þykir ferlega vænt um en fer þess jafnan á leit við blaðamenn að fréttaumfjallanir séu unnar á vandaðan og sanngjarnan máta.