Lögregluaðgerð með aðstoð sérsveitar Ríkislögreglustjóra stendur núna yfir fyrir utan einbýlishús við götuna Norðurvör í Grindavík.

Sjúkrabíll er á vettvangi auk nokkurra lögreglubíla. Sést hefur til sérsveitarmanna með skotvopn á lofti, samkvæmt ábendingu frá borgara. Samkvæmt upplýsingum frá þeim aðila hafði lögregla ekki brotist til inngöngu í húsið þegar síðast var vitað.

„Sérsveitarmenn eru búnir að vopna sig upp og eru með skildi,“ sagði sjónarvotturinn. Hann hefur enga hugmynd um aðdraganda aðgerðarinnar en sagði svona mál vera viðkvæmt í litlum bæ á borð við Grindavík. Málið vekti mikla forvitni í bænum nú þegar. „Þetta er rétt hjá grunnskólanum og það eru krakkar að fara í áttina að þessu. Við erum forvitin í litlu bæjarfélagi.“

DV hafði samband við lögregluna á Suðurnesjum vegna málsins sem staðfesti að lögregluaðgerð væri í gangi en gat ekki veitt neinar frekari upplýsingar um málið í bili.

Uppfært kl. 14:20: DV náði sambandi við Rannveigu Þórisdóttur, samskiptastjóra Ríkislögreglustjóra, en sérsveitin heyrir undir embættið. Rannveig gat staðfest að sérsveitin hefði tekið þátt í lögregluaðgerð í Grindavík en hafði ekki frekari upplýsingar um málið. Vísaði hún þar til lögreglunnar á Suðurnesjum sem enn sem komið er hefur ekki veitt upplýsingar um málið.

Uppfært kl. 15:45: Samkvæmt RÚV hefur sérsveit yfirgefið vettvanginn er lögreglubílar eru þar enn. Vænta má yfirlýsingar lögreglu síðar í dag.