Svona hefst grein eftir Jacob Kaarsbo, sérfræðing hjá dönsku hugveitunni Tænketanken Europa og fyrrum starfsmann leyniþjónustu danska hersins, á vef TV2. Greinin var birt fyrir helgi.
Í greininni bendir hann á fjölda myndbanda frá Yevgeny Prigozhin, leiðtoga Wagner málaliðahópsins, þar sem hann er kominn út í að gagnrýna yfirstjórn rússneska hersins, varnarmálaráðherrann og jafnvel hóta þeim.
„Stóra stigmögnunin átti sér stað 9. maí þegar Pútín sat og horfði á hersýningu á Rauða Torginu í tilefni af sigrinum yfir Þýskalandi nasista 1945. Í klassísku myndbandi sagði Prigozhin skrifræðisyfirmenn hersins vera „föðurlandssvikara“ og skyndilega sagði hann: „Hvað ef það er afi sem bjáni?““
Hann bendir á að í Rússlandi sé eðlilegt að nota „afi“ yfir Pútín og miðað við samhengið geti Prigozhin ekki átt við neinn annan. Þessi ummæli hans hafi farið yfir margar rauðar línur.
„Í Rússlandi „dettur“ fólk venjulega út um glugga eða „hverfur“ fyrir minni sakir. Ef orðræða Prigozhin heldur áfram bendir það til að staða Pútíns hafi veikst mikið,“ segir Kaarsbo.
Hann bendir einnig á að stemmningin í rússneskum fjölmiðlum sé orðin mjög döpur. Nú sé rætt opinberlega um ósigur í Úkraínu en ekki sé langt síðan það hefði haft handtöku í för með sér fyrir svo mikið sem að gefa í skyn að Rússar geti tapað í stríðinu. Hann bendir einnig á að sama stemmning ríki nú hjá rússneskum herbloggurum þar sem nú sé sú skoðun almennt ríkjandi að ósigur sé yfirvofandi.
Hann segir einnig að veiking á völdum Pútín geti haft áhrif á möguleika Úkraínumanna til að gera gagnsókn. Þróunin undanfarið bendi til að rússnesku hersveitirnar í fremstu víglínu séu þreyttar og illa á sig komnar. Ef þær finni að pólitískur óróleiki sé ríkjandi, aukist líkurnar á að þær brotni saman og að varnir Rússa á herteknu svæðunum muni hrynja.
