Stríð, heimsfaraldur, misnotkun áfengis og mikill brottflutningur úr landi hefur haft þær afleiðingar á síðustu tveimur árum að Rússland hefur misst tveimur milljónum fleiri íbúa en í venjulegu árferði. Sá lýðfræðilegi vandi, sem Rússar glíma við, hefur aukist sífellt meira á valdatíma Vladímír Pútíns.

Á þessum áratug hefur væntanleg lífslengd 15 ára rússneskra pilta lækkað um fimm ár og er hún nú á sama stigi og á Haítí sem er land sem er þjakað af mikilli fátækt, náttúruhamförum og ofbeldisöldu af völdum glæpagengja. Þetta segir The Economist.

Samkvæmt tölfræðinni þá deyja rússneskir karlmenn sex árum fyrr en karlar í Bangladess og 18 árum fyrr en japanskir karlar.

Kynjahallinn verður síðan enn meiri þegar ungir menn deyja í stríði eða flýja land. Ekki bætir úr skák að fæðingartíðnin hefur aldrei verið lægri en nú er. Í apríl á síðasta ári fæddust álíka mörg börn og þegar Þjóðverjar herjuðu á landið í síðari heimsstyrjöldinni.

Samkvæmt mati vestrænna sérfræðinga er talið að allt að 200.000 rússneskir hermenn hafi fallið eða týnst í stríðinu í Úkraínu. Á milli 500.000 og 1.000.000 milljón hafa flúið land til að komast hjá herþjónustu. Sem dæmi má nefna að á síðasta ári fluttu 10% af tölvusérfræðingum landsins, flestir ungir menn, til útlanda. Þetta kemur fram í tölum frá upplýsingaráðuneyti landsins.

Nú er svo komið að það eru 10 milljón fleiri konur í Rússlandi en karlar.