„Þessi börn eru að fá að hitta ömmu sína og afa einu sinni á ári í kannski klukkutíma í einhverju húsnæði með einhverja eftirlitsmanneskju sem hangir yfir þér. Það er eftirlit, það er hlustað og horft á allt sem þú segir og gerir og ef þú ætlar að segja eitthvað sem er ekki þeim þóknanlegt að þá er gripið inn í,“ segir Sara Pálsdóttir lögmaður um það verklag sem gildir þegar foreldrar eru sviptir forsjá barna sinna.
„Það er engin rökstuðningur eða nauðsyn á því að ganga svo langt og brjóta svona freklega gegn friðhelgi fjölskyldunnar.“
Þetta segir Sara í viðtalsþættinum Spjallið við Frosta Logason í hlaðvarpsveitunni Brotkast en þar fer lögmaðurinn hörðum orðum um starfsaðferðir barnaverndar á Íslandi. Fullyrðir hún meðal annars að ofbeldi og mannréttindarbrot eigi sér stað innan barnaverndarkerfisins hérlendis. Ofbeldið og mannréttindarbrotin séu framin þegar foreldrar eru sviptir forsjá barna sinna. Þá útskýrir Sara að ein af skilgreiningum andlegs og félagslegs ofbeldis sé eftirlit og stjórnun.
„Ef að þú fengir ekki að hitta börnin þín, ég veit að þú átt ung alveg eins og ég, nema einu til tvisvar á ári í tvær klukkustundir í senn í hrörlegu húsnæði á vegum barnaverndarnefndar með ókunnuga eftirlitsmanneskju hangandi yfir þér sem horfir á allt sem þú segir og allt sem þú gerir…myndir þú upplifa það sem alvarlega nauðung sem veldur þér alvarlegri þjáningu og sársauka,“ spyr lögmaðurinn Frosta í viðtalinu sem játar því umhugsunarlaust.
Bendir Sara á að með þessum aðgerðum barnaverndar er einnig slitið á öll tengsl við afa og ömmur sem og alla stórfjölskyldu viðkomandi barns.
„Normið er svo að þessi börn fá að hitta ömmu sína og afa einu sinni á ári í kannski klukkutíma, einn og hálfan. Það er svo líka erftirlit þar. Ímyndaðu þér niðurlæginguna og sársaukann fyrir þessa einstaklinga sem hafa ekkert annað gert en að elska þessi börn og þrá ekkert annað en að elska þessi börn og veita þeim umhyggju og eyða tíma með þeim,“ segir Sara.
Þá finnst Söru réttlætingar barnaverndar á þessu verklagi algjör þvæla: „Það sem að barnaverndarnefnd gerir til þess að réttlæta þetta er að segja að það megi ekki raska stöðugleika og ró þessara barna í fóstri. Þetta er algjör þvæla,“ segir Sara.
Sara kafar djúpt í mál barnaverndarkerfisins á Íslandi í fyrrgreindu viðtali og segir starfsaðferðirnar í raun ekkert annað en pyntingar og ómannúðleg, vanvirðandi meðferð fyrir þá sem fyrir henni verða en hægt er að nálgast það hjá hlaðvarpsveitunni Brotkast.
