Lögreglan á höfuðborgarsvæðinu hefur sent frá sér tilkynningu vegna skotárásar sem átti sér stað inni á kránni Dubliners snemma í kvöld. DV greindi frá og birti myndir og myndband af vettvangi en sérsveitin var kölluð til vegna árásarinnar.

Í tilkynningu lögreglu kemur fram að tveir gestir á staðnum hafi slasast lítillega í árásinni en skotmannsins er nú leitað:

„Rétt upp úr kl. 19.00 í kvöld fékk Lögreglan á höfuðborgarsvæðinu tilkynningu um að maður hafi komið inn á Dubliners við Naustina í miðborg Reykjavíkur og hleypti af einu skoti inni á staðnum. Skotið hafnaði á vegg við barinn. Maðurinn hljóp síðan strax af vettvangi. Lögreglan brást skjótt við og sendi mikið lið á vettvang ásamt sérsveit og sjúkraliðar voru einnig kallaðir til. Lögreglan vopnaðist og var viðbúnaður mikill. Enginn slasaðist alvarlega en tveir gestir staðarins fengu aðhlynningu, annar með skrámu á höfði og hinn aðilinn hafði áhyggjur af heyrn sinni. Stuttu seinna fundu lögreglumenn skotvopn nærri vettvangi. Lögreglan leitar nú skotmannsins og hvetur viðkomandi til þess að gefa sig fram.“