Frumvarp um bann við bælingarmeðferðum verður lagt fram á breska þinginu í dag. Búist er við því að það fái góðan stuðning enda lofuðu allir flokkar að banna bælingarmeðferðir fyrir síðustu kosningar.

Bælingarmeðferðir eru afar umdeildar og snúast einkum um að reyna að breyta kynhneigð fólks eða að bæla niður kynhneigðina. Þær eru algengar í Bandaríkjunum og eru oft stundaðar af evangelílskum trúarsöfnuðum.

Bælingarmeðferðir eru bannaðar í 26 löndum, þar á meðal á Íslandi, Frakklandi og Spáni. Einnig í mörgum af frjálslyndari fylkjum Bandaríkjanna, á vestur og austurströndinni.

Það er Lloyd Russell-Moyle, þingmaður Verkamannaflokksins frá Brighton, sem leggur fram frumvarpið, en þegar hafa nokkrir þingmenn Íhaldsflokksins lýst stuðningi við það og eru meðflutningsmenn. Líklegt er að það verði tekið fyrir í vor. Staðarblaðið The Argus greinir frá þessu.

Frumvarpið inniheldur einnig bann við bælingarmeðferðum trans-fólks. Allir stóru flokkarnir í Bretlandi lofuðu banni við bælingarmeðferðum fyrir síðustu kosningar, árið 2019, og að bannið myndi ná yfir transfólk líka.

„Frumvörp óbreyttra þingmanna hafa hrundið af stað sumum af mestu samfélagsbreytingunum í þessu landi. Ég er gáttaður á þeim mikla stuðningi sem ég hef fengið frá öllum flokkum við þetta frumvarp,“ sagði Russell-Moyle. „Allt of margir hafa þurft að þjást allt of lengi. Við höfum ábyrgð að tryggja að enginn annar þurfi að þjást í svona meðferð.“