RÚV greindi frá því í gærkvöldi að lögregla hefði sagst ætla að handtaka Ólaf og konu hans ef þau yfirgæfu ekki bæinn. Þau hafa dvalið þar um nætur eftir að hættuástandi var aflýst í bænum en íbúum er aðeins heimilt að dvelja til klukkan 21 á kvöldin.
Í samtali við RÚV í gærkvöldi sagðist Ólafur hafa unnið að viðhaldi á hóteli og veitingastað sem hann rekur í bænum. Lögregla hafi ekið fram hjá húsi þeirra síðustu kvöld án þess að hafa afskipti en í gærkvöldi breyttist það.
„Þá koma hérna lögreglumenn og segja mér að rýma. Ég sagði nei kemur ekki til greina. Það er ekkert að hérna, það er ekkert hættuástand. Stúlkurnar fluttu mér þá kveðju að ef ég héldi þessu til streitu yrði algerlega lokað fyrir alla Grindvíkinga að komast inn í plássið,“ sagði Ólafur við RÚV.
Það var svo laust fyrir klukkan 23 í gærkvöldi að tvær lögreglukonur birtust fyrir utan heimili hans með handtökuheimild. Ákváðu Ólafur og kona hans að yfirgefa bæinn frekar en að vera handtekin.
Hann kveðst ekki vera sáttur við stöðu mála og hann sé ekki eini Grindvíkingurinn sem er þeirrar skoðunar.
