Viðskiptablaðið greinir frá þessari einstöku jólagjöf fyrirtækisins.
Í fréttinni er bent á að velta fyrirtækisins á síðasta ári hafi numið 1,4 milljörðum króna og hagnaðurinn 585 milljónum. Starfsmenn fá því að njóta góðs af þessari velgengni.
Stofnandi fyrirtækisins, Pratik Kumar, var í viðtali við DV sumarið 2018 og þar sagði hann frá því hvernig það kom til að fyrirtækið varð til. Í viðtalinu kom fram að fyrirtækið hafi starfað með mörgum af stærstu fyrirtækjum heims, til dæmis Philips, Microsoft, Intel, Harman Kardon og Samsung.
Patrik fæddist og ólst upp í Nýju-Delí í Indlandi þar sem fjölskylda hans átti verksmiðju sem framleiddi hina ýmsu parta fyrir vélar. Fjölskyldan var vel stæð á indverskan mælikvarða og störfuðu til dæmis sex manns við að þjóna fjölskyldunni á hverjum degi.
Í umræddu viðtali kom hann einmitt líka inn á mikilvægi þess að hafa ánægt starfsfólk í vinnu.
„Vandamálið með allt of mörg tæknifyrirtæki á Íslandi er að þau átta sig ekki á því að án tæknifólksins er fyrirtækið ekki neitt, þetta eru tæknifyrirtæki. Það er of oft sú vinnustaðamenning að yfirmennirnir eða þeir sem stjórna peningunum innan fyrirtækisins haldi að þeir séu verðmætustu starfsmennirnir innan fyrirtækisins en líta á tæknifólkið sem auðveldlega útskiptanlegan hlut, þetta hugarfar gefur þér eingöngu sæmilega góða frammistöðu. Þú getur alveg rekið banka á þann máta en ef þú vilt byggja upp gott tæknifyrirtæki þá getur það tekið mörg ár fyrir starfsmann að koma sér almennilega inn í starfið og fara framleiða alvöru verðmæti innan fyrirtækisins. Starfsfólk er ekki einhver eign sem þú ert að borga mánaðarlegar afborganir af, heldur er starfsfólkið það sem heldur fyrirtækinu gangandi, því án þess er framleiðsluvaran þín ekkert nema hugmynd. Án þessa frábæra starfsfólks sem ég hef, hefði þetta tæki sem við vorum að setja í framleiðslu aldrei orðið að raunveruleika,“ sagði hann meðal annars.
