Pálmi Gestsson fékk 10 þúsund króna stöðumælasekt inn á ógjaldskyldu einkastæði Þjóðleikhússins. Hann segir þetta ekki vera í fyrsta sinn sem stöðumælaverðir fara inn á stæðið og sekta.

„Þeir hafa gert þetta áður. Þeir hafa valsað hér um og sektað,“ segir Pálmi við DV en hann greindi frá sektinni á Facebook síðu sinni og birti mynd af bíl sínum í merktu stæði. „Það er enginn sem kemst inn á svæðið nema starfsfólk Þjóðleikhússins. En samt fara þeir inn og sekta.“

Slá er fyrir svæðinu sem er ætlað fyrir starfsfólk Þjóðleikhússins og enginn annar kemst þar inn. Þetta eru einkastæði og starfsfólkið þarf ekki að greiða fyrir að nota þau.

Þetta er ekki heldur í fyrsta sinn sem mál af þessum toga kemst í fjölmiðla. Því árið 2019 greindi Fréttablaðið frá því að Pálmi hefði verið sektaður.

Á þeim tíma voru miklar framkvæmdir í gangi á Hverfisgötu og aðgengi allt hið versta í kringum Þjóðleikhúsið. Ari Matthíasson, þáverandi Þjóðleikhússtjóri, svaraði að þá hefði stæðið verið skilgreint sem gangstétt og Bílastæðasjóður hefði sagt þeim að umferðarlögin giltu líka um einkastæði.

Pálmi segir að búið sé að ræða við Bílastæðasjóð. „Ég veit ekki hvað kemur út úr þessu. Þetta virðist vera ríki í ríkinu. Það virðist eins og þeir geti gert það sem þeim dettur í hug,“ segir hann.