Mikið hefur verið fjallað um umræddan lager í Sóltúni en þar voru mörg tonn af matvælum geymd við óheilnæmar aðstæður. Rottuskítur var á gólfum og augljós ummerki eftir nagdýr í umræddum lager. Í vikunni kom svo fram að Heilbrigðiseftirliti Reykjavíkur grunaði að matvælum úr kjallaranum hafi verið dreift til matvælafyrirtækja.
Það var þriffyrirtækið Vy-þrif sem hafði umrætt húsnæði á leigu og er það í eigu veitingamannsins Davíðs Viðarssonar sem á Pho Víetnam og er skráður fyrir 40 prósenta eignarhlut í WOKON Mathöll.
Í yfirlýsingu Wok On kemur fram að fyrirtækið vilji koma ákveðnum hlutum á framfæri til að draga úr misskilningi enda „sárt að heyra að búið sé að bendla veitingastaðinn við málið“.
„Wok On hefur ekki keypt neinar vörur sem geymdar voru í vöruhúsinu í Sóltúni. Wok On kaupir nautakjöt frá Esju, kjúkling frá Stjörnugrís, rækjur frá Norðanfisk, egg frá Nesbú og þurrmat aðallega frá Garra en einnig frá Eir, Ekrunni og ÓJK. Grænmetið kemur frá Mata.“
Þá segir í yfirlýsingunni að allar þær vörur sem Wok On kaupir fyrir veitingastaði sína sé hægt að rekja til viðeigandi birgja með kvittunum og reikningum. „Við áréttum því að allar vörur frá Wok On koma frá viðurkenndum birgjum.“
Þá segir enn fremur:
„Wok On ehf. er 100% eigandi og eini rekstraraðili sjö Wok On veitingastaða á höfuðborgarsvæðinu, Akureyri, í Vík og Hveragerði. Davíð Viðarsson á 40% í Wok On Mathöll ehf sem starfrækir veitingastaði Wok On á Höfða og í Hafnarfirði og aðstoðaði hann við opnun þeirra. Einnig á hann húsnæðið sem Wok On Hafnarfirði er í og leigir veitingastaðurinn það rými frá Davíð. Davíð hefur ekki aðkomu að daglegum rekstri staðanna.“
