Lögreglan í Maine í Bandaríkjunum leitar nú að hinum fertuga Robert Card sem skaut að minnsta kosti 22 til bana í Lewiston í gærkvöldi að staðartíma. Á bilinu 50 til 60 eru særðir.

CNN hefur þetta eftir Robert McCarthy, bæjarstjóra í Lewiston. Card er sagður hafa skotið á fólk í keilusal, bar og vörulager.

Lögreglan hefur staðfest að hún leiti að Card. Hann er menntaður skotþjálfari og kann því vel að fara með skotvopn. Hann missti nýlega vinnuna en hann starfaði á endurvinnslustöð.

CNN segir að lögreglan hafi haft mál hans til skoðunar að undanförnu vegna heimilisofbeldis. Hún hefur birt mynd af honum sem var tekin með öryggismyndavél í keiluhöllinni þar sem hann skaut á fólk. Hann er með sjálfvirka byssu í skotstellingu á myndinni.

Hvítur sendibíll í eigu Card fannst í Lisbon, sem er tæpum 2 km suðaustan við Lewiston.

Íbúar í Lewiston og Lisbon hafa verið hvattir til að leita skjóls á meðan Card gengur ljós. Mörg hundruð lögreglumenn leita hans og þjóðvarðliðið hefur boðið fram aðstoð sína.

Alríkislögreglan FBI hefur boðið fram aðstoð sína og yfirvöld í New Hampshire hafa lagt lögreglunni til þyrlu.

Lewiston er tæplega 10 km norðan við Portland, stærstu borgina í Maine.