Mikið var um ölvun og óspektir í miðborg Reykjavíkur í nótt og gista sex fangageymslur lögreglu eftir nóttina. Þetta kemur fram í dagbók lögreglu.
Tilkynnt var um að hóp unglinga hlaupa í kringum bíl í miðborginni og heyrði tilkynnandi einhvern segja „drop the gun“. Lögregla fór á vettvang og kom í ljós að verið var að taka upp tiktok myndband. Leikfangabyssur voru notaðar og er málið litið alvarlegum augum en ekki var hægt að sjá að um leikföng væri að ræða. Málið er unnið í samvinnu við forráðamenn og tveir kærðir fyrir vopnalög.
Tilkynnt var um slagsmál í hverfi 108. Talað var um að steinum hafi verið kastað í fólk. Hinir grunuðu voru farnar af vettvangi þegar lögregla kom.
Tilkynnt var um umferðarslys á Kringlumýrarbraut og að tjónvaldur hafi flúið vettvang. Bíllinn fannst stuttu síðar og var ökumaður handtekinn grunaður um ölvun við akstur og akstur undir áhrifum ávana- og fíkniefna. Var hann vistaður í fangageymslu í þágu rannsóknar máls.
Tilkynnt var um mann að brjótast inn í bíl í hverfi 108. Hann reyndi að stinga lögreglu af á rafmagnshlaupahjóli. Náðist hann, var handtekinn og grunaður um innbrot, þjófnað, vopnalög, bann við akstri undir áhrifum ávana og fíkniefna, að hlýða ekki fyrirmælum lögreglu og vörslu fíkniefna.
