1881 Góðgerðarfélag safnaði einni milljón króna til styrktar Hinsegin félagsmiðstöð Samtakanna ‘78 í átaki sem félagið stóð fyrir í ágúst, eins og segir í tilkynningu frá 1881.

Félagið stóð fyrir sölu stuttermabola í tilefni Hinsegin dagana 8.-13. ágúst í samstarfi við Vero Moda og Jack & Jones. Verkefnið naut liðsinnis Rakelar Tómasdóttur, hönnuðar en hún hannaði einstakt merki bolsins.

„Samasem merkið þýðir að þó svo við séum öll ólík þá erum við öll jöfn. Engin manneskja er merkilegri en önnur, sama hvernig fólk skilgreinir sig eða skilgreinir sig ekki á litrófi regnbogans. Litirnir í merkinu blandast saman sem táknar að það eru endalausir möguleikar og endalausar leiðir til að vera hinsegin. Það er pláss fyrir okkur öll., segir Rakel.

Hinsegin félagsmiðstöð Samtakanna ‘78 sem er fyrir öll ungmenni á aldrinum 13-16 ára sem tengja við hinsegin málefni á einn eða annan hátt.

 „Markmið starfseminnar er að vinna markvisst að því að bæta lýðheilsu hinsegin barna, unglinga og ungmenna og vinna gegn fordómum, mismunun og einelti sem beinist gegn hinsegin börnum í skóla og frístundastarfi.“

 „Þökk sé söfnuninni mun Hinsegin félagsmiðstöðin geta haldið 10-12 ára starfinu áfram en hætta þurfti starfseminni vegna skorts á fjármagni. Það er gríðarlega mikilvægt að halda utan um þennan aldurshóp og erum við því ótrúlega þakklát fyrir stuðninginn og hlökkum til að veita 10-12 ára börnum það örugga og skemmtilega rými sem þau eiga skilið,“ segir Sólrún Klara Þórisdóttir, forstöðukona Hinsegin félagsmiðstöðvarinnar.

 „Söfnunin gekk vonum framar og við erum í skýjunum með afraksturinn. Mörg hundruð manns lögðu verkefninu lið og erum við mjög stolt að geta styrkt jafn mikilvægt starf og Hinsegin félagsmiðstöð ‘78,“  segir Katrín Sigríður Þorsteinsdóttir Bachmann, framkvæmdastjóri 1881 Góðgerðafélags.

Hægt er að fylgjast með næstu verkefnum 1881 á heimasíðu félagsins 1881.is