Sérstök rannsóknarnefnd segist hafa staðfest kjölfar rannsóknar á erfðaefnum að Yevgeny Prigozhin, stofnandi Wagner-hópsins, hafi farist ásamt níu öðrum þegar einkaflugvél brotlenti rétt fyrir utan Moskvu síðastliðinn miðvikudag. Yfirlýsing nefndarinnar birtist á Telegram-síðu hennar en CNN greinir frá.

Segir í yfirlýsingunni að staðfest hafi verið að allir þeir tíu sem voru á lista yfir farþega og áhöfn flugsins hafi farist. Farþegarnir voru alls sjö talsins en áhafnarmeðlimir þrír.

Auk Prigozhin fórust tveir nánir samstarfsmenn hans, Dmitriy Utkin, hans hægri hönd frá upphafi Wagner-hópsins, og Valeriy Chekalov, hans nánasti ráðgjafi.

Í kjölfar tíðinda af brotlendingu flugvélarinnar fóru af stað háværir orðrómar um að Prigozhin hafi ekki verið í vélinni eða hann jafnvel sviðsett slysið sjálfur. Hann hafði til að mynda fengið staðgengla til að breyta nafni sínu í Yevgeny Prigozhin til þess að skapa óvissu um að hann væri á farþegaskrám flugvéla.

Í umfjöllun CNN kemur fram að fréttastofan hafi sótt minningarathöfn um Prigozhin í heimaborg hans St. Pétursborg en þar hafi sumir gestir verið sannfærðir um að Wagner-stjórnandinn væri á lífi og atburðarásin væri liður í ráðabruggi hans.

En hefur ekki verið staðfest hvað var sem grandaði flugvélinni. Líklegast þykir að hún hafi verið skotin niður en þá hefur því einnig verið haldið fram að dulbúin sprengja í vínkassa hafi grandað vélinni.

Flest eru á því að Vladimir Pútín, Rússlandsforseti, hafi fyrirspikað árásina enda með horn í síðu Prigozhin eftir skammvina uppreisn málaliðahersins í sumar. Dmitry Peskov, talsmaður stjórnvalda í Kreml, brást hins vegar reiður við þegar sá orðrómur var borinn undir hann og sagði allt slíkt tal „algjörar lygar“.

Eins og frægt varð minntist Pútín stuttlega á dauða Prigozhin í síðustu viku. Sagði hann hafa verið hæfileikaríkan mann sem þó hefði gert mistök á lífsleiðinni.

Pútín hefur síðan hafist handa við að ná stjórn á málaliðum Wagner-hópsins og krafist þess að þeir sverji stjórnvöldum hollustu.