Eins og greint var frá fyrr í dag hefur ríkissaksóknari áfrýjað til Landsréttar sýknudómi Héraðsdóms Reykjavíkur í máli hjúkrunarfræðings sem var ákærður fyrir manndráp eftir að sjúklingur á geðdeild Landspítalans lést. Hjúkrunarfræðingnum var gefið að sök að hafa þvingað næringardrykkjum ofan í sjúklinginn með þeim afleiðingum að hann kafnaði.

Sjá einnig: Hjúkrunarfræðingur sýknuð af ásökun um að hafa banað sjúklingi á geðdeild – Málinu þó ekki lokið því ríkissaksóknari hefur áfrýjað

Vísir ræddi ákvörðun ríkissaksóknara við Guðbjörgu Pálsdóttur, formann Félags íslenskra hjúkrunarfræðinga, sem er vægast sagt ósátt.

Að málið hafi náð svona langt sé fyrir neðan allar hellur og hún segist hissa og hugsi yfir því að sýknudómnum hafi verið áfrýjað. Hún segir að Héraðsdómur hafi réttilega komist að þessari niððurstöðu.

Guðbjörg segir að félagið hafi ítrekað kallað eftir því að hegningarlögum og lögum um heilbrigðisstarfsfólk verði breytt til að koma í veg fyrir ákærur eins og þessa. Hún segir alvarleg mistök heilbrigisstarfsfólks í langflestum tilfellum afleiðingar raða kerfislægra mistaka.

Lögum hafi verið breytt í þessa veru í nágrannalöndum Íslands og vinna í þá átt sé hafin hér á landi.

Guðbjörg segist ekki vita „á hvaða hausaveiðum yfirvöld eru hérna.“ Mál eins og þetta hjálpi ekki við að halda heilbrigðisstarfsfólki í starfi.