Alexandr Lukashenko, forseti Belarús, staðfesti að Yevgeni Prigozhin, væri nú staddur í Rússlandi, nánar tiltekið St. Pétursborg. Þetta kom fram á blaðamannafundi í Minsk, höfuðborg landsins, í gær. Bendir því allt til þess að samkomulag, sem gert var um að stofnandi Wagner-málaliðahersins myndi fara í útlegð til landsins í kjölfar uppreisnarinnar sem rann út í sandinn, yrði ekki efnt.

Sagði Lukashenko að óvíst væri að Prigozhin né málaliðar hersveitarinnar myndu flytja til landsins og virtist hann ólmur vilja draga úr sögusögnum um að náin vinátta þeirra, í allt að 20 ár,  hefði orðið til þess að samkomulagið náðist. „Pútín þekkir Prigozhin mun betur en ég og hefur þekkt hann lengur en ég, í um 30 ár“ sagði forsetinn.

Blaðamannafundurinn jók á þó óvissu sem ríkur um örlög Prigozhin sem hefur ekki sést opinberlega síðan 24. júní síðastliðinn, rétt eftir að uppreisnin var blásin af.

Eins og DV greindi frá í gær birti rússneski miðillinn Izvestia fréttir af húsleit á heimili og skrifstofu Prigozhin í St. Pétursborg skömmu eftir uppreisnina. Var umfjöllunin með nokkrum ólíkindum og voru birtar myndir af vettvangi auk þess mynda af furðulegum munum sem fundust í leitunum. Meðal annars ýmiskonar vopn, fjölmörg fölsuð vegabréf, hárkollusafn, uppstoppaðan krókódíl sem og innrammaða ljósmynd af afskornum höfðum óvina Prigozhin.

Þá voru birtar myndir af Prigozhin í hinum ýmsu dulargervum og lagt hald á ógrynnin öll af reiðufé, gullstöngum og öðrum verðmætum.

Umfjöllunin hefði aldrei farið í loftið án velþóknunnar rússneskra stjórnvalda og voru kenningar á lofti um að tilgangurinn hefði verið að niðurlægja Prigozhin opinberlega.

Síðan hafa borist nýjar fregnir af því að Wagner-leiðtoginn hafi fengið verðmætin sín aftur í hendur og það hefur aukið enn á hina furðulegu óvissu um örlög Yevgeni Prigozhin.