Rússar létu sprengjum rigna á Úkraínu í nótt, aðfaranótt Sigurdagsins 9. maí þar sem Rússar fagna sigri á Þjóðverjum í seinni heimsstyrjöldinni. Alls var 25 flugskeytum skotið á Úkraínu í nótt en loftvarnarkerfum Úkraínumanna tókst að granda 23 þeirra áður en að þau hæfðu skotmörk sín.

Engar fregnir hafa borist af skemmdum en nóttin var svefnlaus hjá íbúm höfuðborgarinnar Kyiv.

23 out of 25 cruise missiles launched by the enemy last night were shot down including about a dozen in the Kyiv region. No damage reported yet in Kyiv except for a fire caused by falling debris. Not many citizens in the capital got much sleep.

— Ukraine Front Lines (@EuromaidanPR) May 9, 2023

Búist er við að Sigurdagshátíðir um gjörvallt Rússland verði minni í sniðum og tilfinningaríkari en oft áður. Rússar syrgja þá þúsundir hermanna sem hafa fallið á vígvellinum undanfarna mánuði. Þá er talið að minna verði um tæki og tól sem sýnd verði almenningi enda þörfin fyrir þau í framlínunni mikil og Rússar hafa þurft að sætta sig við að mikið af slíkjum tækjum hafa eyðilagst eða fallið í hendur Úkraínumanna undanfarna mánuði.

Þá hafa meintar drónaárásir Úkraínumanna á Kreml undanfarna daga skapað óróa og óvissu meðal Rússa og munu gestir hátíðarhaldanna í höfuðborginni eflaust líta reglulega til himins, svona til vonar og vara.

Vladimir Pútín, Rússlandsforseti, hefur líkt baráttunni í Úkraínu við þá baráttu sem Rússar þurftu að horfast í augu við þegar Þjóðverjar réðust inn í Rússland árið 1941 og má búast við yfirlýsingum á svipuðum nótum í dag.

Pressan á Pútín hefur stigmagnast en í gær var greint frá því að ólígarkinn Andrey Kovalev hefði opinberlega gagnrýnt stríðsbröltið í ræðu sem hefur verið birt á Telegram. Sagði Kovalev að stríðið væri hræðilegt og hefði gert það að verkum að allur heimurinn væri nú á móti Rússum. Slík opinber gagnrýni á Pútín er afar sjaldgæf og gæti verið til marks um að farið sé að fjara undan valdi hans.